ABŞ-ın İrana qarşı yeni iqtisadi sanksiyalar elan etməsi tək bir ölkəyə qarşı davam edən qanunsuz "iqtisadi müharibə"dən daha artığıdır. Bu, Birləşmiş Millətlər Təşkilatının hər bir müstəqil üzv dövləti üzərində eksterritorial suverenlik iddiasıdır.

Axar.az xəbər verir ki, bunu İran Xarici İşlər Nazirliyinin (XİN) sözçüsü İsmayıl Bəqai X hesabında bildirib.

XİN nümayəndəsi ABŞ-ın üçüncü ölkələri İranla ticarət və iqtisadi əlaqələri dayandırmağa məcbur etmə siyasətinin beynəlxalq hüquqa zidd olduğunu vurğulayıb:

"Heç bir dövlət – hər biri öz suvereninin müstəsna yurisdiksiyasına tabe olan – xarici bankları, müəssisələri və ya hava limanlarını üçüncü bir dövlətlə qanuni ticarətdən imtinaya məcbur edə bilməz. Bu cür ikincili sanksiyaların beynəlxalq hüquqda heç bir əsası yoxdur. Suveren bir dövləti öz qanuni siyasət seçimlərini dəyişdirməyə məcbur etmək üçün nəzərdə tutulmuş iqtisadi məcburiyyət açıq-aşkar beynəlxalq hüquqa zidd əməl təşkil edir".

Qeyd edək ki, daha əvvəl ABŞ maliyyə naziri Skott Bessent İranla istənilən biznes əməliyyatının hökumətin ciddi təzyiqi ilə qarşılaşacağını açıqlayıb.