Pakistanın Baş naziri Məhəmməd Şahbaz Şərif Səudiyyə Ərəbistanının vəliəhdi və Baş naziri Məhəmməd bin Salman bin Əbdüləziz əs-Səud ilə telefon danışığı aparıb.

Axar.az Report-a istinadən xəbər verir ki, səmimi və dostluq şəraitində keçən söhbət zamanı Baş nazir Pakistanın husilərin Səudiyyə Ərəbistanının mülki və iqtisadi infrastrukturuna son hücumlarını qətiyyətlə pislədiyini bir daha bildirib. Şahbaz Şərif husilərin əməllərinin regional sülh və təhlükəsizliyə təhdid yaratdığını, həmçinin qlobal iqtisadiyyatı və enerji təchizatını daha da sabitsizləşdirə biləcəyini deyib.

Baş nazir feldmarşal Seyid Asim Munir və Baş nazirin müavini Məhəmməd İshaq Darla birlikdə gərginliyin azaldılması və regionda sülhün bərqərar olması istiqamətində səylərini davam etdirəcəyini bildirib.

Bu baxımdan Şahbaz Şərif böhran boyunca Səudiyyə vəliəhdinin müdrik və uzaqgörən rəhbərliyini yüksək qiymətləndirib. Baş nazir həmçinin İki Müqəddəs Məscidin Xadimi, Səudiyyə Ərəbistanı Kralı Salman bin Əbdüləziz əs-Səuda səmimi arzularını və ehtiramlarını çatdırıb.

Öz növbəsində Məhəmməd bin Salman Pakistanın Səudiyyə Ərəbistanına dəyişməz dəstəyinə, eləcə də regionda sülh və sabitliyin təmin olunması istiqamətində səylərinə görə minnətdarlığını bildirib.

İki ölkənin liderləri bundan sonra da sıx əlaqələri davam etdirmək barədə razılığa gəlib və yaxın vaxtlarda görüşəcəklərinə ümidvar olduqlarını bildiriblər.