Rusların yarıdan çoxu SSRİ-nin yenidən bərpa olunmasına inanmır.

Axar.az xəbər verir ki, bu nəticə Ümumrusiya İctimai Fikrin Tədqiqatı Mərkəzinin keçirdiyi sorğudan sonra əldə olunub.

Sorğu iştirakçılarının 63%-i SSRİ-nin süqutundan təəssüfləndiyini bildirib. 56% şəxs isə “SSRİ qoruna bilərdi” fikrinə inandığını bəyan edib. Ruslar SSRİ-nin bərpasını istəməsələr də, keçmiş postsovet ölkələrinin yeni ittifaqda birləşməyinə inanırlar (52%).

Rusiya ilə bərabər, eyni sorğu MDB-nin 3 ölkəsində də aparılıb. Bunlar Ermənistan, Moldova və Ukrayna olublar. Maraqlı məqam odur ki, bu ölkələrin hər birində fərqli nəticələr əldə olunub. Moldovalıların 51%-i SSRİ-nin dağılmasının qaçılmaz olduğuna inanmadıqlarını söyləyiblər. Lakin Ermənistan (26%) və Ukraynada (30%) əhalinin çox az bir qismi bu fikri müdafiə edib.

Ermənistan və Moldovada əhalinin böyük bir qismi SSRİ-nin süqutundan təəssüflənir. İrəvanda əhalinin 56%-i, Moldovada isə 50%-i bu mövqedə dayanır. Eləcə də ermənilər və moldovalıların 45%-i keçmiş sovet ölkələrinin vahid parlamenti, vahid valyutası, vahid sərhədləri olan respublikada birləşməsini dəstəkləyiblər. Ukraynada isə bu göstərici cəmi 19% təşkil edib.