Rusiya Dnestryanı konfliktinin həlli ilə bağlı danışıqların aktivləşdirilməsində maraqlıdır.

Axar.az xəbər verir ki, bunu jurnalistlərə açıqlamasında Rusiya Baş nazirinin müavini Dmitri Roqozin söyləyib. Dnestryanıdakı iqtisadi problemlərdən bəhs edən Roqozin Moldovanın bu problemlərin həlli istiqamətində pozitiv addımlar atmasını istəyib:

“Biz Dnestrin hər iki sahilinin əhalisinin maraqlarına cavab verəcək şəkildə bu məsələni həll etməyə çalışacağıq. Bizim tətbiq edəcəyimiz həll planında uduzan tərəf olmayacaq. Moldova Rusiya ilə strateji tərəfdaşlıq qurmadan yaşaya bilməz. Bu, təkcə iqtisadi baxımdan yox, həm də Moldova dövlətinin qorunması baxımından da önəmlidir”.

Qeyd edək ki, Roqozin dünən Moldovaya səfər edib. O, ölkə prezidenti İqor Dodonla gecə saat üçdə görüşüb.

Dnestryanı Moldova ərazisidir. 1992-ci ildə Moskvanın aktiv dəstəyi ilə bu ərazi Kişniyovun nəzarətindən çıxıb. Hazırda Dnestryanı ərazisində Rusiya bazaları var.