Bəhreyn Daxili İşlər Nazirliyi bu ölkədə İran rejiminə, o cümlədən də SEPAH-a bağlı terrorçu qruplaşmanın üzvlərinin tutulması barədə bəyanat yayıb.

Axar.az xəbər verir ki, bəyanatda Bəhreyn təhlükəsizlik qüvvələrinin ölkənin Əl-Deyr məntəqəsində keçirdiyi qabaqlayıcı əməliyyatda İran rejimi ilə birbaşa əlaqədə olan və ölkədə təxribat törətmək üçün SEPAH-dan göstəriş alan terrorçu qruplaşmanın üzvlərinin zərərsizləşdirildiyi bildirilib.

Tutulanlardan külli miqdarda partlayıcı maddə aşkarlanaraq götürüldüyü qeyd olunub.

Bəhreyn Milli Təhlükəsizlik Təşkilatının rəhbəri, general Tariq Bin Həsən əl-Həsən məsələ ilə bağlı jurnalistlərə açıqlamasında bildirib ki, tutulan terrorçular partlayıcı maddələr hazırlamaq üçün bir neçə dəfə İrana səfər edərək bu ölkədə təlim keçiblər.