Türkiyədə CHP və MHP-nin prezidentliyə namizəd olaraq təklif etdiyi Ekmələddin İhsanoğlu yayımladığı video ilə rəsmi Tvitter hesabını açıqlayıb.

Axar.az xəbər verir ki, "Yutub" video paylaşım saytında video yayımlayan İhsanoğlu mesajında belə deyib: "Mənim adıma açılan müxtəlif Tvitter hesablarından mənə aid olmayan bəyənatların yayımlanmasından sonra fərziyyələrə son nöqtəni qoymaq istədim".

İhsanoğlu paylaşdığı videoda bunları da qeyd edib: "Sizinlə əhəmiyyətli bir qeydi paylaşmaq istəyirəm. Mənim rəsmi Tvitter hesabım "@profdrihsanoglu"dur. Bundan başqa adıma olan bütün Tvitter hesabları saxtadır, lütfən onlara etibar etməyin, təşəkkür edirəm".

İhsanoğlu dünən məsciddən çıxarkən etdiyi açıqlamada adına bir neçə saxta Tvitter hesabının açıldığını bildirərək, belə demişdi: "Şəxsi Tvitter və Feysbuk hesabım yoxdur. Yaxın günlərdə açacağıq. Adıma açılan profillərlə əlaqədar şikayət edəcəyik. Tvitter hesabımı yaxında mətbuata bildirəcəyik".