Böyük Britaniyanın keçmiş Baş naziri Toni Blerin baldızı Qəzzada gördüyü hadisələrdən sonra İslam dinini qəbul etdiyini etiraf edib.

Axar.az xəbər verir ki, keçmiş baş nazirin baldızı 47 yaşlı Lauren Bos 2010-cu ildə islamı qəbul edərkən Fələstində baş verən hadisələrin ona böyük təsir etdiyini deyib.

Onun sözlərinə görə, Fələstin xalqı ona çox şey öyrədib: "4 il əvvəl mən Qəzzaya gedəndə tam fərqli bir düşüncəyə sahib idim. Amma orada gördüklərim məni dəyişdi. Və mən islamı qəbul etdim. Oradakı insanlar öləndə cənnətə düşəcəyinə inanır. Bu əslində saflığın, səmimiliyin nümunəsidir".

Lauren Bos onu da bildirib ki, son dövrdə İsrailin Qəzzanı bombalaması təkcə Fələstin üçün deyil, bütün bəşəriyyət üçün qətliamdır: "İsrail ordusu yüzlərlə körpəni şikəst edir. Bu acını gələcəkdə dünya çəkəcək".

­Lauren bacısının həyat yoldaşı olan Toni Bler haqqında sərt fikirlər söyləyib: "O bəlkə də indi Baham adalarında dincəlir. Fələstin xalqına heç bir faydası yoxdur. Əgər onu tapsanız, onu axtardığımı deyin".

Qeyd edək ki, "Pliz Trail" adlı yardım təşkilatının qurucusu olan Lauren Bos Fələstində yerləşən mərkəzi ofisləri vasitəsi ilə mütəmadi olaraq Qəzzaya maddi yardımlar, dərman və qida məhsulları göndərir.