Sentyabrın 1-i "Dünya Sülh günü" ilə əlaqədar Romada futbol yarışı keçirilib.

Axar.az xəbər verir ki, katolik aləminin ruhani lideri Papa Fransiskin ideyası ilə "Sülh üçün dinlərarası matç" adı altında keçirilən yarışı argentinalı keçmiş futbolçu, "İnter" FK-nın başqan köməkçisi Xaviyer Zanetti təşkil edib.

Matçda dünya futbol tarixinə adını qızıl hərflərlə yazdıran argentinalı əfsanə futbolçu Dieqo Maradonadan, italyan Roberto Baccio, kolumbiyalı Karlos Valderrama, ukraynalı Andrey Şevçenko, türk futbolçusu Əmrə Bələzoğluna qədər 50 futbolçu forma geyinib.

Argentina Milli Komandasının baş məşqçisi Jerardo Martino matçda "PUPİ" komandasının, İngiltərə Primyer Liqa komandalarından "Arsenal"ın baş məşqçisi Fransız Arsen Venqer isə "Şolaz" komandasının baş məşqçisiliyini boynuna götürüb.

Matçı 6:3 hesabı ilə "PUPİ" komandası qazanıb. "PUPİ" komandasına gümüş rəngli "Zeytun ağacı" kuboku verilib.

Matçın qalibi olan "PUPİ" komandasında 31-ci dəqiqədə oyuna daxil olan Türkiyə milli futbolçusu Əmrə Bələzoğlu ilk yarının sonuna qədər forma geyinib. Argentinalı əfsanəvi futbolçu Dieqo Maradona isə 90 dəqiqə sahədə qalıb.

Qapı arxası tribunaların boş qaldığı yarışı təxminən 20 min adam izləyib. Tribunalarda müxtəlif millətlərin bayraqları diqqəti çəkib, xüsusən bir qrup fələstinlinin öz bayraqları ilə matçı izləməsi xüsusi marağa səbəb olub.

Xatırladaq ki, matçın təşkil olunması ideyasını verən Papa Fransisk özü müəyyən səbəblərdən stadiona gələ bilməyib.