Rusiya Prezidenti Vladimir Putinin əfvi ilə həbsdən azad olunan YUKOS neft şirkətinin keçmiş prezidenti Mixail Xodorkovski Rusiya Prezidenti olmağa hazır olduğunu deyib.

Axar.az xəbər verir ki, Fransanın "Le Monde" qəzetinə müsahibə verən Xodorkovski böhran zamanında deyil, normal cəmiyyətin qurulduğu zaman prezident olmaq arzusunu dilə gətirib:

"Ölkəmin normal şəkildə inkişaf etdiyi bir vəziyyətdə Rusiya Federasiyasının dövlət başçısı olmaq istəyərəm. Lakin böhrandan çıxmaq, konstitusiya islahatı kimi proseslər burada müstəsnadır. Hakimiyyətin məhkəmə, parlament və toplumda paylaşılmasını təmin edəcək konstitusiya islahatları müzakirə mövzusu olarsa, vəzifə almağa hazıram".

Xatırladaq ki, 2003-cü ildə dələduzluq və başqa cinayətlərin törədilməsində təqsirli bilinən milyarder düz 10 il sonra - 20 dekabr 2013-cü ildə Putinin sərəncamı ilə əfv olunaraq azadlığa çıxıb.