Rusiya Dumasının spikeri Vyaçeslav Volodin Türkiyə parlamentinin sədri Binəli Yıldırımdan 7 il əvvəl atası tərəfindən qaçırılaraq Türkiyəyə aparılan Rusiya vətəndaşı Aylin Aydəmirlə bağlı məsələnin həll olunmasını istəyib.

Axar.az xəbər verir ki, bu barədə məlumatı Sputnik yayıb. Məlumata görə, Volodin uşağın anasına qaytarılması ilə bağlı məhkəmə qərarına əməl edilməsini tələb edib:

"Diqqətinizi Rusiya vətəndaşı Aylin Aydəmirlə bağlı məsələyə çəkmək istəyirəm. İstanbul Məhkəməsi uşağın qaçırılmasını qəbul etdi və uşağın atası ilə bağlı həbs qərarı verildi. Ancaq buna baxmayaraq, uşağın anasına təhvil verilməsi məsələsində hələ də problem yaşanır. Bununla bağlı qərarın yerinə yetirilməsini istəyirik. Bu məsələni nəzarətinizdə saxlayacağınıza ümid edirəm”.

Rusiyalı həmkarının tələbinə cavab verən Binəli Yıldırım isə məsələnin şəxsən öz nəzarəti altında həll ediləcəyini bildirərək, məhkəmə qərarına baxmayaraq, uşağın anadan uzaq yaşamasının doğru olmadığını vurğulayıb.

Qeyd edək ki, türkiyəli iş adamı Murad Aydəmir keçmiş həyat yoldaşı Rusiya vətəndaşı Zarina Albeqonovadan olan qızı Aylin Aydəmiri 2011-ci ildə Türkiyəyə qaçırıb. İstanbul Cəza Məhkəməsi 2012-ci ildə Aydəmiri uşaq qaçırmaqda ittiham edərək 5 ay həbs cəzası vermişdi. Ancaq məhkəmənin uşağın anasına təhvil verilməsi ilə bağlı qərarı bu günə kimi yerinə yetirilməyib.

Bir müddət öncə isə Rusiya vətəndaşı olan qızın anasına geri qaytarılması üçün Rusiya Duması 3 deputatın Türkiyəyə göndəriləcəyini açıqlamışdı.