Ana səhifə Planet |
Rusiya Federal Təhlükəsizlik Xidmətinin (FSB) sədri Aleksandr Bortnikov beynəlxalq terror qruplaşmalarının İŞİD ətrafında təşkilatlanmağa başladığını açıqlayıb.
Axar.az xəbər verir ki, FSB sədri İŞİD-in Yaxın Şərqdə çox təhlükəli quruluşa çevrildiyini gizlətməyib:
"İŞİD İraq və Suriyada çox güclənib. Burada döyüşən terrorçular həm də dünyanın dörd bir tərəfindən gələnlərdir. Deməli terror dünyanı bürüyə bilər".
MDB və Avropa Birliyi ölkələrindən gələn insanların İŞİD tərkibində digər ölkələri hədəfə aldığını deyən baş kəşfiyyatçı təşkilatın maliyyə mənbəyinin haradan qaynaqlandığını da açıqlayıb: "İŞİD maliyyə baxımından öz-özünü təmin edir. Ən təhlükəlisi də budur. Digər tərəfdən, təşkilat narkotik, insan qaçaqçılığı və ya digər qeyri-qanuni yollarla pul qazanmır. Onlar yalnız qaçaq neft satışlarından gəlir əldə edir. Bu da döyüşməyə kifayətdir".
İŞİD təcrübəsinin digər terror təşkilatlarına yayılacağını deyən FSB rəhbəri vəziyyətin təhlükəli hal ala biləcəyindən narahatlıq ifadə edib:
"İŞİD-in neft qaçaqmalçılığı yolu ilə külli miqdarda gəlir əldə etməsi digər dünya çaplı terror təşkilatlarına nümunə ola bilər. Bir müddətdən sonra Taliban və Əl Qaidə də İŞİD təcrübəsindən yararlanacaq. Belə olan təqdirdə onlarla mübarizə daha çətin olacaq".
Tarix
2014.11.06 / 00:25
|
Müəllif
Şəmsəddin Ənsar
|