Hazırda gözləməkdən başqa edə biləcəyimiz heç nə yoxdur. Ali Seçki Qurumu bütün prosesi idarə edib, daha sonra yekun qərarını açıqlayacaq.

Axar.az xəbər verir ki, bu sözləri Cümhur İttifaqının İstanbul bələdiyyə sədrliyinə namizədi Binəli Yıldırım deyib.

“Müxtəlif ilçələrdə səslərin sayılması davam etdiyi üçün nəticələr mütəmadi dəyişir. Ancaq müəyyən həcmdə aradakı fərqin azaldığını müşahidə edirik. Detallı fəaliyyəti ilçələrdəki seçki qurumlarının təşkil etdiyi heyətlər icra edir. Bu detalları mənim çatdırmağım doğru olmaz. Söyləyəcəyim tək bir şey var. Qanunlara uyğun şəkildə işlər aparılır. ASQ səslərin yenidən sayılması ilə ortaya çıxan rəqəmləri işləyir. Hazırda proses başa çatmadan bir söz deməyim düzgün olmaz. Çünki bu işin sahibi ASQ-dir”, - Yıldırım bildirib.

B.Yıldırım həmçinin deyib ki. indiyə qədər aradakı fərq 18 min səsə düşüb:

"Hələ sayılacaq çox sandıq (səsvermə qutusu) var. Biz sayımın tam bitməsindən sonra nəticələrin dəyişəcəyi qənaətindəyik".

Yıldırım təkrar seçkinin mümkünlüyü barədə suala "Biz nə ilçə, nə mahal, nə də ASQ-yıq, bu qərarı onlar verir, nə qərar verilərsə, başımız üstünə" deyə cavablandırıb.

AKP-nin İstanbul namizədi həmçinin qarşı tərəfin narahatlığını da anlamadığını bildirib. Onun sözlərinə görə, əgər özlərinə güvənclidirlərsə, təkrar sayımdan narahat olmağa heç bir ehtiyac yoxdur:

"ASQ kimə imtiyaz verəcəksə, bələdiyyə sədri də o olacaq".

AKP-nin İstanbul mahal başqanı Bayram Şənocaq isə indiyə qədər AKP namizədinin topladığı səslərin 12.300 artdığını bildirib və hazırda prosesin davam etdiyini deyib.

***

AKP sədrinin müavini Əli İhsan Yavuz indiyə qədər AKP-nin lehinə 13 min 969 səs əlavə edildiyini və fərqin 18 minin altına düşdüyünü açıqlayıb.

Qüsurlar olan sandıqların 2 min civarında olduğunu, indyə qədər sayılanların isə bu rəqəmin 3-də 1-ni əhatələdiyini bildirən Yavuz rəqəmlərin dəyişə biləcəyini bildirib.

Jurnalistin sualına cavab olaraq Yavuz deyib ki, CHP-çi Ə.İmamoğlu fərqin 29 mindən aşağı olmadığını bildirdiyi halda indi fərqin (AKP-çi Yıldırımdan daha artıq topladığı səslərin – red.) 17 minin altına düşməyəcəyini deyirsə, demək, bir sıra qüsurlar olduğunu CHP də qəbul edir.