Türkiyənin Tekirdağ vilayətinin Hayrabolu rayonunda təşkil olunan festivalda səhnəyə çıxan məşhur reper Çakal (Əmirxan Çakal) konsertdən sonra silahlı hücuma məruz qalıb.

Kult.az Axşam.az-a istinadən xəbər verir ki, hadisə içkili bir şəxsin təsadüfi açdığı atəş nəticəsində baş verib.

İddialara görə, Çakalın həyat yoldaşı ilə foto çəkdirə bilməyən bir şəxs yaxınlıqdakı bağ evində spirtli içki qəbul etdikdən sonra havaya tüfənglə atəş açıb. Tüfəngdən çıxan qırmalar reperin ayağına dəyib. Yaralanan sənətçi əvvəlcə Hayrabolu Dövlət Xəstəxanasında ilkin tibbi yardım alıb, daha sonra isə İstanbulda yerləşən özəl xəstəxanaya təxliyə edilib.

Başlanan istintaq çərçivəsində saxlanılan şəxs hadisəni etiraf edib. Onun yüksək dərəcədə sərxoş olduğu və reperi təsadüfən vurduğu məlum olub.

Hadisə ilə bağlı araşdırmalar davam etdirilir.