"Kafirləri qan içində boğacağıq"

​
Musavat.com "Assoşayted Press"ə ("The Associated Press") istinadən "Boko Haram" kütləvi qətliam səhnəsini özündə əks etdirən dəhşətli video-görüntüləri yayımlayıb. Üzü üstə torpağa uzadılmış insanları güllələyən ekstremistlər deyiblər ki, bu insanları kafir olduqlarına görə öldürürük.

Videoda aydın görünür ki, sılahlı adam meyitlərin sıxlığından çətinliklə irəliləyə bilir. Videoda aldığı güllə yarasından hələ can verən insanlar da aydın görünür. Qətl edilənlərin əksəriyyəti yeniyetmələrdir.

"Biz əminik ki, qan bu zalın damına qədər qalxmalıdır. Biz gələcək hücumlarımızda da kafirlərlə belə davranacağıq, - qrupun lideri video-görüntüdə deyir. - Bundan sonra qətl, qırğın, dağıdıcılıq və bomba partlayışları bizim dini vəzifəmizin bir hissəsi olacaq. Biz işğal etdiyimiz hər yerdə bunları törədəcəyik".

Bu video jurnalistlərin əlinə şənbə günü axşam çatıb.

Agentlik qeyd edir ki, "Boko Haram"ın əsas hədəfləri arasında məktəblilər və tələbələr xüsusi yer tutur. Terrorçuların düşüncəsinə görə, Qərbyönlü təhsil günahla doludur.

"Boko Haram" deyib ki, onlar yalnız kafirləri öldürürlər. Mömin müsəlmanlar isə xilafətdə rahat yaşaya bilərlər.

Videoda diqqətçəkən məqamlardan biri də dustaqlarla bağlıdır. Terrorçuların lideri Məhəmməd peyğəmbərdən (s) sitat gətirir, dustaqların həbsdə saxlanılmalı olduğunu deyir, öldürülməsinin qadağan edildiyini xatırladır: "Ancaq bizim indi dustaqları həbsdə saxlamağa imkanımız yoxdur. Ona görə də dustaqlar qan içində boğulacaqlar..."

Terrorçuların lideri bildirib ki, öldürülənlərin bəziləri özlərini müsəlman adlandırır. Ancaq onlar şəriət qanunlarına görə kafirdirlər.

Agentlik qeyd edir ki, "Boko Haram" son 5 ildə minlərlə insan öldürüb. 1.6 milyon insan isə terrorçuların əlindən başqa ölkələrə pənah aparıb...