Ukrayna böhranının həlli istiqamətində sabah Minskdə təşkil olunacaq zirvə üçün bu gün keçirilən Berlin hazırlığı başa çatıb.

Axar.az xəbər verir ki, Rusiya, Ukrayna, Almaniya və Fransa liderlərinin iştirak edəcəyi zirvədən öncə bu ölkələrin xarici işlər nazirləri bir araya gəlib.

8 saat davam edən toplantının məhsuldar keçdiyi bildirilib.

Ukraynanın Almaniyadakı səfiri Andrey Melnik görüşlə bağlı jurnalistlərə verdiyi açıqlamasında müzakirələrin çətin keçdiyini deyib:

"Berlində 8 saat davam edən çətin görüş sona çatdı. Minskdə liderlər səviyyəsində Normandiya formatında keçiriləcək danışıqlar üçün bəzi konkret nəticələr əldə edildi".

Ukrayna Xarici İşlər Nazirliyinin sözçüsü Yevhen Perebinis də ümidli danışıb. Qurum rəsmisi Minsk zirvəsi üçün optimist olduqlarını, ancaq ən pis ssenariyə də hazır olduqlarını dilə gətirib:

"Minsk zirvəsində nəticə əldə edilməsə, Qərb ölkələrinin reaksiyası çox sərt olacaq. Avropa Birliyi əlavə sanksiyaların tətbiq olunmasını gələn həftəyə saxlayıb. Bundan başqa, Obama da Kiyevə ölümcül silah göndərilməsi ilə bağlı qərarını Minsk zirvəsindən sonra edəcək".