Krakovdan İrlandiyanın Şannon şəhərinə uçan təyyarə Almaniyanın Berlin-Şyonefeld hava limanına gözlənilməz eniş edib.

Axar.az xəbər verir ki, təyyarənin məcburi enişinə səbəb sərxoş vəziyyətdə bir sərnişinin onda partlayıcı qurğu olmasını bildirməsi olub. Sərnişin bir neçə dəfə hədə-qorxu gəldikdən sonra təyyarənin heyəti Berlində enmək qərarına gəlib.

Təhlükəsizlik üçün təyyarə hava limanı binasından və digər təyyarələrdən bir qədər kənarda eniş edib. Polis əməkdaşları sərxoş sərnişini yerli polis bölməsinə aparıblar. Bölmədə testdən keçirilərkən məlum olub ki, onun qanında alkoqolun miqdarı həddindən artıqdır.

Digər sərnişinlər zəruri təhlükəsizlik tədbirlərindən sonra yenidən təyyarənin bortuna qalxıblar.

Polis əməkdaşları bildiriblər ki, asayiş pozuntusuna yol verən sərnişin məsuliyyətə cəlb olunacaq.