2015-2017-ci illərdə Avropa Birliyi ölkələrində oğurlanan avtomobillərin sayı açıqlanıb.

Axar.az xəbər verir ki, bu barədə AB-nin statistika agentliyi Avrostat məlumat yayıb.

Məlumatda bildirilib ki, bu illərdə AB məkanında 697 min avtomobil oğurlanıb. Bu, 2008-2010-cu illərlə müqayisədə 29 faiz azdır. Həmin illərdə AB ölkələrində oğurlanan avtomobillərin sayı 983 min olub.

Qeyd olunub ki, 2015-2017-ci illərdə ən çox avtomobil oğurluğu Lüksemburqda qeydə alınıb. Bu ölkədə əhalinin hər 100 min nəfəri üzrə 328 oğurluq hadisəsi qeydə alınıb. Bu göstərici üzrə sonrakı iki pillədə Yunanıstan (269) və İtaliya (257) qərarlaşıb. Ən az avtomobil oğurluğu isə Danimarkada qeydə alınıb. Şimali Avropa ölkəsində əhalinin 100 min nəfəri üzrə cəmi 4 avtomobil oğurluğu hadisəsi baş verib.