Əgər nəzarətsizlik səbəbindən yoluxucu xəstəlik ölkəyə ayaq açarsa, bu, ciddi nəticələrə əsas olacaq.

Axar.az xəbər verir ki, bunu Koreya Xalq Demokratik Respublikasının (KXDR) lideri Kim Çen İn hakim Koreya Fəhlə Partiyasının siyasi bürosunun koronavirus epidemiyası ilə mübarizə və qabaqlayıcı tədbirlərə həsr olunan iclasında deyib. O, partiya və hökumətin hələ əvvəldən koronavirusun ölkədə yayılmasına qarşı gördüyü lazımi işlərin əminlik yaratdığını bildirib.

“Antiepidemiya sistemi çərçivəsində heç bir xüsusi hallara yol verilməməlidir”, - deyən KXDR lideri əlavə edib ki, ölkənin bütün sahələri epidemiya əleyhinə fövqəladə iş üzrə mərkəzi qərargahın komandanlığına və idarəsinə qeyd-şərtsiz tabe olan ciddi nizam-intizam yaratmalıdırlar. O, səlahiyyətli qurumlara və şəxslərə yoluxucu xəstəliyin yol tapa biləcəyi bütün kanalları və sahələri əhatə etməyi, nəzarəti, yoxlamaları və karantini gücləndirməyi tapşırıb.

“Bizim epidemiya əleyhinə həyata keçirdiyimiz tədbirlər xalqın qorunması üçün mühüm dövlət işidir və yalnız xəstəliyin profilaktikası deyil, partiyanın mərkəzi komitəsinin böyük məsuliyyətidir”, -deyə Kim Çen İn bildirib.

Qeyd edək ki, rəsmi məlumatlara əsasən, Şimali Koreyada hələlik yeni koronavirusa (Kovid-19) yoluxma faktı qeydə alınmayıb. Buna baxmayaraq, ölkədə qabaqlayıcı tədbirlər həyata keçirilir. Buraya virusun meydana çıxdığı və ən çox yayıldığı Çin ilə gediş-gəlişin dayandırılması, orta məktəblərdə tətil müddətinin uzadılması, habelə Cənubi Koreya ilə sərhəddə demarkasiya xəttində müvafiq tədbirlərin görülməsi daxildir.