İŞİD-dən qaçan terror təşkilatının keçmiş üzvü təşkilatın əsirləri edam etməzdən əvvəl onları dəfələrlə məşq etdirdiyini və öldürüləcəklərini bilmədikləri üçün də videolarda sakit göründüklərini söyləyib.

Axar.az xəbər verir ki, özünü Saleh kimi təqdim edən İŞİD-ın keçmiş üzvü "Skay Nyus" TV-yə verdiyi xüsusi müsahibədə əsirlərin başını kəsən Cihadçı Con ləqəbli Məhəmməd Emvazinin girovlardan birinin başını kəsərkən şəxsən orada olduğunu iddia edərək Emvazinin təşkilat içində vəzifəsinin xarici əsirləri öldürmək olduğunu söyləyib.

İŞİD-çi yapon əsir Kenci Qoto edam edilərkən də orada olub. Onun təşkilatdakı vəzifəsi isə xarici əsirləri təhlükəsizlikləri ilə bağlı əmin etmək imiş. Saleh əsirlərin həqiqətən öldürülmədən öncə dəfələrlə saxta edama məruz qaldıqlarını, buna görə də video görüntülərdə sakit dayana bildiklərini söyləyib.

Saleh əsirləri onları orada qonaq kimi saxladıqlarına inandırırmış: "Məndən əsirlərə "problem yoxdur, sadəcə video çəkirik, sizi öldürməyəcəyik. Bu videodan hökumətinizin Suriyaya hücum etməsini dayandırmaq üçün istifadə edəcəyik. Sizinlə heç bir problemimiz yoxdur. Siz bizim qonağımızsınız", - demək tələb olunurdu. Onlara narahat olmamalarını söyləyirdim, amma axırda öldürüləcəklərini bilirdim".