Son günlər Ermənistan ordusunun verdiyi itkilərin kütləviliyi erməni ictimaiyyətində Sərkisyan hakimiyyətinə qarşı qəzəbi daha da artırıb.

ANS-in məlumatına görə, Qarabağ daşnaklarının lideri, eks-komandir, hazırda millət vəkili olan Vaan Badasyan Serj Sərkisyanın Rusiyanı Azərbaycana silah satmaqda ittiham etməsi barədə açıqlamasının ermənilərə baha başa gəldiyini bildirib.

Erməni millət vəkilinin fikrincə, Rusiyanın Azərbaycana silah satması Kremlin maraqlarına daha çox uyğundur. Digər bir tərəfdən Rusiya həm Azərbaycanı, həm də Ermənistanı münaqişənin gərginləşməsinə təhrik edir.

Qarabağ müharibəsinin ilk illərində erməni ordusunun Azərbaycan ordusundan güclü olduğunu xatırladan Vaan Badasyan Azərbaycanın gücləndiyini etiraf edib: "Azərbaycanın hərbi xərcləri Ermənistanın büdcəsindən daha çoxdur. Bu isə Azərbaycanın rahat hərəkət etməsini və heç nədən çəkinməməsini şərtləndirir".

Erməni millət vəkili Ermənistanda sosial ədalətin qorunmamasının orduya təsirsiz qalmadığını, silahlı qüvvələrdə nizam-intizamın pozulmasına gətirib çıxardığını sözlərinə əlavə edib.