"Ermənistanın borclanmasının sürətlənməsi son bir ildə nəzərə çarpacaq dərəcədə yüksəlib".

Bu barədə Axar.az-a açıqlamasında iqtisadçı ekspert Natiq Cəfərli deyib. O bildirib ki, əgər Moskva İrəvana öz yardım əlini uzatmasa, təhlükəni önləmək heç cür mümkün olmayacaq:

"Çünki Ermənistan iqtisadiyyatı Rusiya ilə çox sıx bağlıdır. Demək olar ki, Rusiya iqtisadiyyatının gözaltısı şəklində fəaliyyət göstərir. Rus şirkətlərinin və kapitalının Ermənistanda ciddi rolu var. Onlar son illərdə Rusiyadan gələn vəsaitlərin hesabına ayaqda qalırdı. Bu bir il ərzində Rusiyada olan böhranlı vəziyyət, Moskvaya qarşı sanksiyaların tətbiqi, iqtisadi vəziyyətin ağırlaşması, gəlirlərin azalması Kremlin İrəvandakı iqtisadi fəaliyyətini xeyli dərəcədə zəiflədib və Ermənistana kəskin şəkildə təsir göstərib. Rublun ucuzlaşması belə Ermənistanda milli valyutanın getdikcə dəyərsizləşməsinə səbəb olub. Son bir ildə dram təqribən 30 faizə yaxın dəyərsizləşib. Belə bir şəraitdə Ermənistan başqa mənbələrdən borclanması hesabına ayaqda qalmağa, daxili, iqtisadi problemlərini həll etməyə məcburdur. Ermənistanın borc yükünün artması əsasən Rusiyada gedən proseslərlə bağlıdır. İqtisadiyyatının çox zəif və dayanıqsız olmasına görə gələcəkdə borcların qaytarılmasında ciddi problemlər yaşanacaq. Əgər proses bu sürətlə davam edərsə, Rusiyada vəziyyət düzəlməsə və Moskva İrəvana öz yardım əlini əvvəlki illərdə olduğu kimi uzatmasa, bir neçə ilə İrəvan çökəcək. Bu isə Ermənistanın hətta bankrot elan olunmasına gətirib çıxara bilər".