"Davudoğlunun 2013-cü ildə ABŞ-ın Pensilvaniya ştatında Fətullah Gülən ilə görüşəcəyi barədə əvvəlcədən xəbərim vardı".

Axar.az xəbər verir ki, bu açıqlama ilə Türkiyə Prezidenti Rəcəb Tayyib Ərdoğan çıxış edib. O, həmin dövrdə xarici işlər naziri olan Əhməd Davudoğlunun Pensilvaniyaya getmək üçün ondan icazə aldığını bildirib:

"Əhməd bəy Pensilvaniyaya məndən icazə alıb getmişdi. O vaxt bizim rəsmi şəxslər ora tez-tez gedirdilər. Təbii ki, bir müddət sonra onlara Pensilvaniyaya getməyi qadağan etdim. Çünki bu məni narahat edirdi".

Qeyd edək ki, Davudoğlu bir müddət öncə 2013-cü ilin sentyabrında Pensilvaniyada Fətullah Gülənlə görüşün pərdəarxası detallarını ictimaiyyətə açıqlayıb. O, Gülənlə həmin dövrdə prezident olan Abdullah Gül və Baş nazir Ərdoğanın razılığı ilə görüşdüyünü bildirib. Lakin Abdullah Gül daha sonra açıqlama verərək, bu ziyarət barədə xəbərinin olmadığını deyib.