"Alparslan Türkeş ermənilərlə bağlı elə faktlar deyib ki, onu heç bizim özümüz də bilmirdik".

"Axar.az" məlumat verir ki, bu açıqlama ilə 1993-cü ildə Ermənistanın eks-prezidenti Levon Ter-Petrosyanla Alparslan Türkeşin görüşünü təşkil edən Fransa ermənisi Samson Azarat çıxış edib.

O, Alparslan Türkeşin dediyi faktların çoxları tərəfindən bəlli olmadığını da bildirib: "Ermənilərlə türklərin əlaqəsi 1915-ci il yox, ondan 600 il əvvələ qədər uzanır. Biz bir yerdə mahnılar oxuyur, qohumluq münasibətləri yaradırdıq. Malazgird döyüşündə, İstanbulun fəthində, Çanaqqala savaşında ermənilər hər zaman türklərin yanında olublar. Atatürkün əmri ilə hazırlanan müasir əlifbanın da müəllifi erməni filoloqu Akop Martayandır".

O , Türkeşin Ermənistanla münasibətlərin düzələcəyi zaman Türkiyənin dəniz, torpaq yollarının ermənilərin üzünə açıq olacağına, eləcə də, Transqafqaz magistralının həyata keçiriləcəyinə söz verdiyini deyib.

Qeyd edək ki, 1997-ci ildə vəfat edən Alparslan Türkeş Türkiyə Millətçi Hərəkat Partiyasının yaradıcısıdır.