Son zamanlarda dünyanın tanınmış iqtisadi mərkəzlərinin hesabat və proqnozlarında qarşıdan gələn illərdə yeni bir böhranın olacağı bildirilir. İlkin iddialara görə, yeni iqtisadi böhran dalğası 2025-2026-cı ildə başlayacaq.

Mövzu ilə bağlı Axar.az-a açıqlama verən iqtisadçı Natiq Cəfərli bildirib ki, geridə qoyduğumuz 2020-ci il bütün dünya üçün çox ağır il oldu.

Onun sözlərinə görə, ABŞ, Çin, Rusiya kimi ölkələr 2021-ci il üçün həm ölkə daxili, həm də dünya iqtisadiyyatına trilyonlarla dollar vəsait xərcləyir:

“Maliyyə bazarına bu qədər pulun xərclənməsi təbii ki, ciddi fəsadlara səbəb ola bilər. Buna görə də hazırda biz dünyada bu günə qədər görünməyən bir prosesin şahidi oluruq. Baxmayaraq ki, dünyada hər keçən gün ümumdaxili məhsul aşağı düşür, ölkələrin iqtisadiyyatları daralır, lakin dünya birja indeksləri sürətlə yüksəlir.

Dünya birjalarında indekslərin sürətli yüksəlməsinin başlıca səbəbi qeyd etdiyim ölkələrin ümumilikdə 14 trilyon dolları iqtisadi bazara buraxmasıdır. Yəni hazırda dünya birjalarında o qədər bol rekvizitliklər var ki, dünya iqtisadiyyatında hər şey bahalaşıb.

Düşünürəm ki, yaxın zamanlarda dünya iqtisadiyyatından bu rekvizitlik bolluğunun çəkilməsinin şahidi olmalıyıq. Bunun başqa yolu yoxdur. Yəni mərkəzi banklar faizləri artıraraq infilyasiyanın qarşısını almağa çalışacaq.

Mövcud bazardakı artıq rekvizitlərin çəkilməsindən sonra dünya yeni bir iqtisadi böhranla üzləşə bilər. Çünki bazar özünü tənzimləmək və yeni sistem qurmaq üçün belə bir prosesə getməyə məcburdur. Bu mənada qarşıdakı illərdə dünya yeni iqtisadi böhran dalğası ilə üzləşə bilər”.