Fransanın təhvil verməkdən imtina etdiyi "Mistral" hərbi gəmisinə alternativ gəmi hazırlanacaq. "Lavina" adı verilən gəminin ilk dəfə Sankt Peterburq Beynəlxalq Müdafiə Sərgisində tanıdılacağı deyilir.

Axar.az Rusiya mediasına istinadla xəbər verir ki, Rusiyanın "Lavina"sı "Mistral"dan daha sürətli olacaq.

Hələlik ortada yalnız gizli hazırlanan maketin olduğu deyilir.

Ancaq "Lavina"nın bəzi texniki detalları indidən bilinir. 24 ton ağırlığında, 200 metr uzunluğunda, 34 metr genişliyində nəzərdə tutulan gəmi 50 tank və hərbi vasitə və ya 500 hərbi birlik, 6 gəmi, 16 zenit sistemi və hücum vertolyotu daşıya biləcək. "Lavina"lar həm də sürəti 19 knot/saat olan "Mistral" gəmilərindən daha sürətli olacaq.

Sərgidə ayrıca Kripton Kh-31AD yüksək sürətli zenit raketlərlə bərabər S-400 Triumf, S-300V, Antey-2500, S-300MU2 raketlərinin modelləri də ziyarətçilərə təqdim ediləcək.

Bundan başqa, dizel-elektrik sualtı qayıqları, yüngül döyüş gəmisi, hava yastıqlı eniş vasitəsi, terrorla mübarizə məqsədli gəmi modelləri də sərgiyə çıxarılacaq.