2015-07-04 22:48:00

İrəvanda elektrik enerjisi tariflərinin qalxmasına qarşı etiraz edənlər yenidən Baqramyan prospektinə toplaşıblar.

APA-nın məlumatına görə, bu axşam aksiyanın təşkilatçılarından biri David Sansaryan mübarizənin yeni strategiyasını bəyan edəcək.

Hazırda fəalların hansı addımlar atacağı bəlli deyil. Aksiyanın təşkilatçıları qeyd ediblər ki, onların hərəkətləri sülh xarakterli olacaq. Hüquq-mühafizə orqanlarının iddiasına görə isə, fəallar polisə qarşı təxribat hazırlayır, onlar küçədə çadır qurmaq və şəhərin digər yollarını bağlamaq niyyətindədirlər.

2015-07-05 01:11:00

Ermənistanda elektrik enerjisinin qiymətinin artımına qarşı etiraz edənlər hakimiyyətə ultimatum verib.

ANS-in məlumatına görə, bunu etiraz aksiyasının təşkilatçılarından biri David Sanasaryan bildirib.

"Biz Baqramyan prospektini açmayacağıq. Bazar ertəsi, axşamadək gözləyəcəyik. Tələblərimizin yerinə yetirilmədiyi təqdirdə biz "Bir addım irəli!" aksiyasına başlayıb zibil qutularından ibarət barrikadaları prezident iqamətgahı istiqamətinə yönəldəcəyik", deyə D.Sanasaryan bildirib.

Qeyd edək ki, Ermənistanda elektrik enerjisinini qiymətinə qarşı mitinq edənlər yenidən paytaxt mərkəzində yerləşən Baqramyan prospektinə axışmağa başlayıb. Artıq 10 gündən çoxdur ki, etirazçılar meydandan çıxmır və hökümətə öz etirazlarını bildirirlər.

İstirahət gününə baxmayaraq, nümayişçilər ərazini tərk etmirlər. Barrikadalar qurulub və dinamiklərlə küçənin ortasında yenidən vətənpərvərlik mahnıları səslənir. Aksiyaların musiqi müşaiyəti artıq mitinq edənlərin xüsusi ənənəsi olub. Belə ki, cümə günü təxminən 300 insan prospektdə yerli rok qrupunun təşkil etdiyi konsertdə olublar.