"Civ-civ civildəyən bir qadına "sus" deməyimə görə məni günahkar çıxardılar".

Axar.az-ın məlumatına görə, bunu Türkiyə Baş nazirinin köməkçisi Bülənt Arınç səsləndirib.

Parlamentdə HDP-nin Diyarbəkirdən olan millət vəkili Nursəl Aydoğana "bir sus, qadın" söyləyən Arınç ictimai qınaqla üzləşib.

Onun fikrincə, PKK-nı terror təşkilatı kimi görməyən və bu silahlı birləşmənin əməllərini cinayət saymayan millət vəkilləri ilə heç bir ortaq dəyər ola bilməz:

"Mən bir qadına və onun həyatına qarşı çıxan insan deyiləm. Ancaq parlamentdə iki sualım oldu və hələ də cavabını ala bilməmişəm. Bu suallarıma cavab verə bilməyənlər mənə həqarət etməkdədirlər.

Yenə soruşuram - Ceylanpınarda evində yatan iki gənc polisimizi öldürənlər özlərini HPG ünsürləri kimi təqdim etdilər. Yəni PKK-nın bir qolu. Bunlar belə etdilərsə, cəzalarını verəcəyik.

Bir hərbçimiz xanımı və övladı ilə Malazgirtdə yeməyə getdi, restorandan çıxanda avtomobilində vuruldu. Yenə PKK üzərinə götürdü. Məclisdə həmin millət vəkillərindən soruşdum ki, PKK bu cinayətləri öz üzərinə götürdüyü halda niyə onları lənətləmirsiz? Ancaq qarşılığında bir qadına "sus" dediyim üçün məni günahlandırırlar".