Əgər oğlum edam olunarsa, Əsəd ailəsi barədə hər şeyi etiraf edəcəm.

Axar.az xəbər verir ki, bu barədə rejim ordusunun polkovnikini öldürdükdən sonra həbs edilən Suriya Prezidenti Bəşər Əsədin əmisi oğlu Süleyman Hilal Əsədin anası Fatimə Məsud Əsəd deyib.

O, Əsəd rejimini açıq şəkildə təhdid edib:

"Oğlumun niyə qurban edildiyini bilirəm. Əgər bu edam reallaşarsa, ailədəki hər kəsin gizli işlərini açıqlayacam. Əsəd nəslindəki şəxslər arasında qətl, zorlama və xəyanət kimi cinayətləri olan bir çox adam var".

Fatimə Əsədin bu sözlərindən sonra rejimin Hilal Əsəd barəsində hansı qərar verəcəyi isə maraqla gözlənilir.

Qeyd edək ki, Hilal Əsəd ötən həftə Latakiyada Suriya ordusunun polkovniki Hesan Şeyhiyi onu yolda maşınla ötməsi səbəbindən öldürmüşdü. Xalq isə Hilal Əsədin cəzalandırılmasını tələb etmiş, əks təqdirdə itaətsizlik göstərəcəyini bildirmişdi. Bəşər Əsəd hadisədən xəbər tutduqdan sonra qohumunun cəzalandırılacağı barədə vəd vermişdi.