Son bir neçə il ərzində Çin Mərkəzi Asiyaya milyardlarla dollar investisiya yatırıb.

Axar.az xəbər verir ki, bu barədə informasiyanı Rusiyanın "Vedomosti" qəzeti yayıb. Qəzet Pekinin bu siyasətinin bölgədə güc balansının dəyişməsinə gətirib çıxaracağını bildirib:

"Lakin Çinin iqtisadi ekspansiyası elə onun özü üçün də yeni risklərə gətirib çıxara bilər. Pekinin bölgəyə investisiya axınını gücləndirməsi, Əfqanıstanla sərhəd olan və tam stabil olmayan regionda siyasi problemlərin həllinə Çinin özü də cəlb edilə bilər. Qərbin regiona marağı azalır, üstəlik, Rusiyanın bölgəyə investisiya imkanları öz iqtisadi çətinlikləri ucbatından sıfıra enir. Artıq Çinlə beş Mərkəzi Asiya ölkəsi arasında ticarət dövriyyəsi 2013-cü ildə 50 milyard dollar olub. Bu isə Rusiya ilə bu ölkələr arasındakı ticarət dövriyyəsindən çoxdur. Nəticədə yaxın bir neçə il ərzində nə Qərb, nə də ki Rusiya bu balansı dəyişdirə bilməyəcək".