Belçikanın paytaxtı Brüsseldə antiterror hazırlığı yüksək səviyyədə saxlanılır. Bazar ertəsinə qədər bütün metro və təhsil ocaqları bağlı qalacaq. Krallığın digər ərazilərində isə terror təhlükəsi maksimum səviyyədə - üçüncü mərhələdə saxlanılacaq.

Axar.az xəbər verir ki, bu barədə Belçikanın Baş naziri Şarl Mişel hökumətin təcili yığıncağında bildirib.

"Biz bir və bir neçə terrorçunun Parisdəki kimi terror törətməsindən narahatıq. Eyni anda müxtəlif yerlərə zərbə vurulması cəhdi istisna deyil. Onların hədəfi çoxlu insanların yığışdığı yerlərdir. Buna görə də metro sabaha qədər bağlı qalacaq. Məktəblər, litseylər və universitetlər bazar ertəsi işləməyəcək", - baş nazir bildirib.

Bu arada Belçika təhlükəsizlik qüvvələri paytaxtdakı "Radisson" otelini terror xəbərdarlığı ilə mühasirəyə alıb. Oteldəkilərə otaqlardan çıxmamaq tövsiyyə olunub.