Gürcüstanın keçmiş Baş naziri Bidzina İvanişvili şəxsən "Qazprom"la danışıqların aparılmasında maraqlıdır.

Axar.az xəbər verir ki, bunu Gürcüstan mətbuatına açıqlamasında Milli Hərəkat Partiyasından olan deputat Nuqzar Tsiklauri deyib. Onun sözlərinə görə, bu danışıqlar davam etsə, "Qazprom" Gürcüstan bazarına girəcək:

"Bu "Qazprom"un ən böyük səhmdarı olan İvanişvilinin Gürcüstanın milli maraqları hesabına öz sərvətini artırmasıdır. Rusiya ilə razılaşma ölkənin milli təhlükəsizliyi üçün böyük zərbə olacaq".

Qeyd edək ki, hazırda Gürcüstana əsas qaz tədarükçüsü Azərbaycandır. Hazırda Rusiyadan Ermənistana ötürülən qazın tranzitinə görə Gürcüstana ümumi tədarükün 10%-i ödənilir. 2014-cü ildə "Qazprom" Gürcüstana 300 milyon kub metr qaz verib.

İvanişvili 2012-ci ildə Gürcüstanda keçirilən parlament seçkilərindən öncə özünün Rusiyadakı əksər səhmlərini satıb. Lakin sonralar "Qardian" qəzetinin apardığı araşdırmalardan sonra İvanişvilinin hələ də "Qazprom"da böyük səhm paketinə sahib olduğu ortaya çıxıb.