Almaniyanın Münhen şəhərində dünya liderləri Suriyada müharibənin dayandırılması üçün razılıq əldə etdilər. Lakin Qərb diplomatlarının və xüsusi xidmət orqanlarının imzaladığı bu razılıq Suriyaya sülh gətirmək əvəzinə bu ölkəni iki yerə parçalayacaq.

Axar.az xəbər verir ki, bu barədə "Faynənşl Tayms" qəzeti yazıb.

Adı açıqlanmayan kəşfiyyat nümayəndəsi nəşrə açıqlamasında da Suriyanın iki cəbhəyə ayrıldığını təsdiqləyib:

"Bombaların hara atıldığına nəzər yetirməmiz kifayətdir. Son iki ayda cərəyan edən hadisələrə baxanda görə bilərik ki, Suriyada iki cəbhə formalaşıb. Bir cəbhə Vaşinqton, digəri isə Moskva tərəfindən idarə edilir. Əməliyyatlar tərəflər arasında bölünüb. Sual isə belədir: "Bu, belə də davam edəcəkmi?"

Qeyd edək ki, Almaniyanın Münhen şəhərində Rusiya və ABŞ rəsmiləri Suriyada atəşkəsin təmin edilməsi üçün razılıq əldə ediblər.

Razılaşma nəticəsində Suriyadakı müxalif qrupların fəaliyyətinə sərbəstlik verilib. Həmçinin humanitar yardımlarla bağlı yeni qərarlar qəbul olunub.