Bütün səylərimə baxmayaraq, hörmətli Ərdoğanı Gülən camaatından uzaqlaşdıra bilmədik.

Axar.az-ın xəbərinə görə, bu sözləri PKK lideri Abdullah Öcalan deyib.

2013-cü ildə HDP-nın İmralıya gedən heyətinin Öcalanla etdiyi söhbətdən sonra çap olunan "Demokratik qurtuluş və azad həyat" adlı kitabdan seçmələrin növbəti hissəsi mətbuatda tirajlanıb.

Sözügedən kitabda əksini tapan PKK liderinin sözlərinə görə, Fətullah Gülən camaatı baş naziri bütünlüklə özünə bağlayıb: "Gülən əfəndi Xomeyni kimi Ankaraya gəlsəydi, İrandakı vəziyyət təkrarlanacaq və bütün müxalifəti məhv edən faşizm başlayacaqdı. Gülən camaatının mərkəzi ABŞ-dır.

Mənə görə, Fətullah bədbəxt adamdır. Mən bura (İmralı həbsxanasını nəzərdə tutur – red.) salınandan Gülən də ABŞ-da saxlanılır. Nur hərəkatını incələyin. Səid Nursi qədim Nurs kəndindəndir. Bu, köhnə erməni kəndidir. Gülən 120 dövlətdə məktəb açıb. Bu pullar haradan gəlir?"

Xatırladaq ki, 2013-cü il 17 dekabrdan Ərdoğan dövlətin içinə sızan "paralel yapı"ya (Gülən camaatının dövlət içində dövlət yaratması) qarşı mübarizəyə start verib.