Sosial şəbəkələrdə Krımın ilhaqı ərəfəsində Qırğızıstan və Belarus prezidentlərinin yarımada ilə bağlı Rusiyaya tarix dərsi vermələrini əks etdirən video yenidən gündəmə gəlib.

Axar.az xəbər verir ki, videoda Qırğızıstan Prezidenti Almazbek Atambayev və Belarus Prezidenti Aleksandr Lukaşenko Rusiyanın Krımı ilhaqını düzgün saymadığını bildirir.

"Tarixən orada əvvəlcə türk, uyğur və qırğız xaqanlığı olub. Daha sonra isə Qızıl Orda həmin bölgəni tutub. İndiki Qazaxıstan isə Qızıl Ordanın varisidir", - Atambayev deyib.

Lukaşenko isə bu torpağın öncə kimin olmasına nəzər salınarsa, Krımın Qazaxıstana verilməli olduğunu bildirib:

"Çoxları Krımın doğru olmayaraq Ukraynanın tərkibinə birləşdirildiyini iddia edir və bu ərazinin tarixi rus torpaqları olduğunu deyir. Bu, doğru yanaşma deyil. Onda Batı xanın zamanına, monqol-tatar dövrünə qayıdaq. Qazaxıstan, Monqolustan Şərqi Avropaya kimi gəlmişdilər və demək olar ki, Rusiyanın bütün ərazisini tutmuşdular. Onda bu əraziləri Qazaxıstana, Monqolustana verək. Əlbəttə, Belarusdan başqa. Çünki onlar bizlərə toxunmamışdılar. Biz sərhədləri yenidən çəkə bilmərik".

Qeyd edək ki, 2014-cü ilin martın 19-da Krım Rusiyaya ilhaq olunub.