Yunanıstan Baş naziri Aleksis Çipras Türkiyənin Egey dənizində NATO-nun miqrant siyasətinə zərbə vurduğunu və türk hərbi təyyarələrinin yunan hava məkanını tez-tez pozduğunu bildirib.

Axar.az xəbər verir ki, Çipras bunu NATO Baş katibi Yens Stoltenberqlə görüşü zamanı bildirib.

Rəsmi Ankara yunan baş nazin iddialarına dərhal cavab verib.

Türkiyə Xarici İşlər Nazirliyinin sözçüsü Tanju Bilgiç Çiprasın açıqlamalarının tamamilə əsassız olduğunu bildirib:

"Egey dənizində NATO-nun fəaliyyətlərinin icrasına Türkiyənin mane olması ilə bağlı iddialar əsasız və haqsızdır".

Bilgiç Avropa Birliyi ilə martın 18-də imzalanan razılaşmadan sonra Türkiyənin səyləri nəticəsində Egey dənizində miqrant axınının demək olar ki, dayandırıldığını bildirib.