Dnestryanı hakimiyyət orqanları Rusiyadan qaz tədarükünün dayandırılması nəticəsində yaranan kommunal fəlakət kontekstində Avropa qazından və hətta Qərbdən gələn humanitar yardımdan imtina edib.

Axar.az xəbər verir ki, bu barədə "Politiko” məlumat yayıb.

Nəşr Kişinyovla separatçıların nəzarətində olan "Tiraspoltransqaz" müəssisəsi arasında yazışmalara istinadən vurğulayır ki, imtina yəqin ki, separatçıların öz təşəbbüsü deyil, Moskvanın sifarişi olub:

“Dnestryanıda yüz minlərlə insan öz mənzillərində istilik və isti su olmadan qalsa da, yerli “hakimiyyət” Rusiyadan gəlməyən, alternativ qaz təchizatı təkliflərini rədd edib. “Moldovaqaz” şirkəti separatçılara yerli ehtiyacları ödəmək üçün Avropanın qaz platformalarından qaz almaqla yardım təklif edib. Təklifə cavab olaraq bildirilib ki, bu, əslində "Qazprom"dan sabit tədarükdən xeyli yüksək və qeyri-sabit qiymətlərlə spekulyativ şərtlərlə alışa keçid deməkdir. Dnestryanı hazırda Rusiya və Moldovadan qaz almır, Moldova rəsmiləri isə deyirlər ki, separatçı rəhbərlik humanitar yardımı, xüsusilə də generatorları qəbul etməkdən imtina edir.

Moldova hökumətindəki mənbə bu sənədlərin həqiqiliyini təsdiqləyib və əlavə edib ki, separatçıların qəti mövqeyinin arxasında çox güman ki, yerli liderlər deyil, Moskva dayanır”.