Dünyanın ən böyük neft ixracatçısı Səudiyyə Ərəbistanı bu il hasilatı önəmli dərəcədə artırmağı və bazardakı mövqeyini genişləndirməyi planlaşdırır.

Axar.az xəbər verir ki, bu barədə Səudiyyə Ərəbistanının "Saudi Aramko" dövlət neft şirkətinin rəhbəri Amin Nasir deyib.

"Hasilatı artırmağın çətin olmasına baxmayaraq, biz bunu edə bilərik. Xüsusilə, növbəti bir neçə həftə ərzində Şayba yatağında gündəlik 33 faiz və yaxud 1 milyon barrelə qədər hasilatın artırılması planlaşdırılır", - Nasir bildirib.

Hazırda Səudiyyə Ərəbistanı gündəlik 10,3 milyon barrelə yaxın neft çıxarır.

İranın ötən ay neft ölkələrinin Qətərdə baş tutan görüşünə qatılmaması nəticəsində Səudiyyə Ərəbistanı hasilatın dondurulması barədə razılaşmadan imtina edib. İran gündəlik hasilatını 4 milyon barrelə qədər artırdıqdan sonra bu sazişi dəstəkləyəcəyini bildirib.

"İstehsal və ixrac məsələlərində Səudiyyə ilə elan olunmamış müharibə vəziyyətindəyik. Bizə qarşı təxribatlar var. Bu qeyri-ənənəvi müharibənin məqsədi İranın neft bazarındakı mövqeyini pozmaq məqsədi daşıyır", - İranın Neft naziri Bicən Zəngənə bir neçə gün öncə deyib.