İranla bağlı son dərəcə pessimistəm. Tramp administrasiyası Bayden administrasiyasından daha çox İsrail tərəfdarı ola bilər. Əsəd devrildiyindən İsrail bunu İrana zərbə endirmək fürsəti kimi görür, bu məqsəd açıq şəkildə müzakirə olunur.

Axar.az xəbər verir ki, bu sözləri erməni mediasına geniş müsahibəsində diplomat, Rusiya-ABŞ prezidentlərinin ikitərəfli əməkdaşlığın inkişafı komissiyasında ABŞ tərəfindən təmsil olunan sabiq müşavir Ceyms Karden deyib.

“İran bu riskin fərqindədir. Bu yaxınlarda onlar MAQATE ilə daha sərt yoxlama rejiminə dair razılığa gəliblər ki, bu da danışıqlara hazır olduqlarını göstərir. Onlar əlbəttə ki, 2003-cü ildə İraqla baş verənləri təkrarlamaq istəmirlər. Bununla belə, mən qorxuram ki, yaxın gələcəkdə ABŞ-ın İranla müharibəyə cəlbi real ehtimaldır. Administrasiya başa düşür ki, əgər İrana qarşı hərəkət etmək istəyirlərsə, Ukraynadakı münaqişə bitməmiş bunu etməlidirlər.

Administrasiya açıq şəkildə sülh və danışıqlardan bəhs edə bilər, lakin Ukraynada münaqişənin davam etdirilməsi İranla müharibə etmək istəyənlərin maraqlarına uyğundur. Ona görə də təəssüf ki, Ukraynada sülhə o qədər də ümid bəsləmirəm”, - o vurğulayıb.