Rusiya Xarici İşlər Nazirliyi Böyük Britaniya səfirliyinin rusiyalı jurnalistə hücumla bağlı cinayət işinin araşdırılmasına köməklik göstərəcəyini gözləyir və hüquq-mühafizə orqanlarının sonrakı sorğularına operativ reaksiya verməyə çağırır.

Axar.az xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarovanın deyib.

"Öz növbəsində, Rusiya XİN Böyük Britaniyanın Moskvadakı diplomatik nümayəndəliyinə rəsmi nota göndərib, orada xüsusilə qeyd olunur: "Nazirlik gözləyir ki, səfirlik Rusiya hüquq-mühafizə orqanlarına bu cinayət işinin araşdırılmasında, o cümlədən səfirlik əməkdaşlarının prosessual hərəkətlərdə iştirakında hər cür köməklik göstərəcək". Rusiya Britaniya səfirliyini bu araşdırma çərçivəsində hüquq-mühafizə orqanlarının sonrakı müraciətlərinə operativ və lazımi şəkildə cavab verməyə çağırıb", - o bildirib.

Zaxarova vurğulayıb ki, bəzi Qərb ölkələrinin diplomatlarının rusiyalı jurnalistlərə qarşı hərəkətləri onların statusuna uyğun gəlmir.

Qeyd edək ki, 2024-cü ilin oktyabrında Vnukovo hava limanında rusiyalı jurnalist britaniyalı diplomata “narahat suallar” verib və bu zaman diplomat onu bərk itələyib, operatorun “Press” nişanı cırılıb.