ABŞ, Rusiya və Ukrayna Səudiyyə Ərəbistanında keçirilən danışıqlar çərçivəsində atəşkəsin həyata keçirilməsi proseduru, qoşunların geri çəkilməsi və monitorinq qruplarının yaradılmasını müzakirə edəcək.

Axar.az xəbər verir ki, bu məlumatı “Nezıqar” Teleqram kanalı diplomatik mənbəyə istinadla yayıb.

Bildirilib ki, atəşkəsə Ukraynanın payıza qədər prezident və parlament seçkilərini keçirmək öhdəliyi daxil ediləcək:

"Rusiya tərəfi bunda israrlıdır. Həmçinin Moskva Rusiyanın banklarına tətbiq edilən sanksiyaların qaldırılması və beynəlxalq pul köçürmələrinin bərpa edilməsini istəyir".

Mənbənin sözlərinə görə, Rusiya Kiyevlə birbaşa danışıqlara getməyəcək və Zelenski ilə hər hansı bir sənəd imzalamayacaq.

Analitiklərin fikrincə, atəşkəs dövründə Ukraynada növbədənkənar seçkilərin keçirilməsi vəziyyəti qarışdıra və Ukrayna Silahlı Qüvvələrinin ehtiyatlarını toplamasına və cəbhədə rotasiya aparmasına mane ola bilər.

"Yeni Tramp komandası münaqişə məsələlərinə çox səthi yanaşır və Trampın həddindən artıq optimizmi danışıqlar prosesinin mürəkkəbliyini əks etdirmir", - deyə diplomatik mənbə vurğulayıb.