Misirin “Al Masria” Hava Yollarına məxsus UJ681 reysi ilə Şarm əş-Şeyxdən Kalininqrada uçan təyyarə Polşanın Poznan şəhərinə təcili eniş edib.

Axar.az xəbər verir ki, bu barədə “Maş” Teleqram kanalı məlumat yayıb.

Məlumata görə, güclü qar səbəbindən Xrabrovo hava limanına enə bilməyən təyyarənin ekipajı Polşadan təcili eniş tələb edib.

Bildirilib ki, polşalılar təyyarəyə yanacaq vurmaqdan imtina edir və uçuşa icazə vermirlər.

Sərnişnlərdən birinin kanala verdiyi məlumata görə, artıq 10 saatdır uçuş üçün icazə gözləyirlər.

“Yemək qurtarıb, içməli su demək olar ki, bitmək üzrədir. Təyyarədə aralarında hamilə qadınların və uşaqların da olduğu 236 sərnişin var”, - məlumatda qeyd olunub.