ABŞ və Ukrayna hökumət rəsmiləri bir həftə ərzində nadir torpaq elementləri və minerallar üzrə iqtisadi tərəfdaşlıq sazişi imzalaya bilərlər.

Axar.az xəbər verir ki, bu barədə “Axios” portalı öz mənbələrinə istinadən məlumat yayıb.

“Ukraynalı rəsmi bildirib ki, sövdələşmə yaxındır. Saziş layihəsinə əsasən, tərəflər Ukraynanın yenidən qurulması üçün birgə investisiya fondu yaratmağı planlaşdırır. Sənədə əsasən, ABŞ hökuməti sabit və iqtisadi cəhətdən çiçəklənən Ukraynanı inkişaf etdirmək üçün maliyyə öhdəliklərini üzərinə götürəcək. Eyni zamanda, Vaşinqton heç bir təhlükəsizlik zəmanəti vermir.

Müqavilənin şərtləri Ukraynanın fonda təxminən 500 milyard dollar töhfə verməli olduğunu və Kiyevin maliyyə sərmayəsinin Vaşinqtonun oxşar öhdəliklərindən iki dəfə çox olacağını nəzərdə tutur”, - deyə bildirilib.

Sənəddə həmçinin Ukraynanın faydalı qazıntılar, neft və qaz hasilatından əldə etdiyi gəlirin 50%-nin fonda köçürülməsi nəzərdə tutulur.