2023-cü ildə Qarabağ tamamilə Azərbaycanın yurisdiksiyasına keçdikdən sonra Bakı daha müstəqil rol oynamağa, Rusiyaya və başqalarına nə isə göstərməyə çalışır.

Axar.az xəbər verir ki, bunu rusiyalı politoloq Sergey Markedonov deyib.

O qeyd edib ki, Rusiya ilə Azərbaycan arasında münasibətlər həmişə mürəkkəb olub:

“Moskva Qarabağda əsas moderator olanda Bakıya təsir imkanları indikindən daha çox idi. Bu gün Azərbaycan özünü qəyyumluqdan qurtarmağa çalışır. Təyyarə ilə bağlı vəziyyət çox xoşagəlməzdir, lakin bu halda Azərbaycan bizim münasibətlərimizin artıq “Moskva moderatordur və Bakı onun ardınca gedir” formatında olmadığını göstərir. Bakı göstərmək istəyir ki, əlaqələr üfüqi, tərəfdaşlığa əsaslanan kontaktlar formatında gedir. İndi Rusiyanın xüsusi rolu olan sülhməramlılar və ya ATƏT-in Minsk qrupu kimi xüsusi təsir alətləri yoxdur. Bu alətlər yoxa çıxır və Bakı Moskva ilə dialoq yolu ilə öz bazasını təmin etməyə çalışır”.

Onun sözlərinə görə, Azərbaycan bunu bəzi simvolik hərəkətlərlə tamamlayır:

“İnformasiya kampaniyası nöqteyi-nəzərindən Azərbaycan çox səmərəli şəkildə öz sakinlərinə nümayiş etdirməyə çalışır ki, biz bəzi problemləri həm Qərbə, həm də Moskvaya göstəririk. Eyni zamanda, Azərbaycan həmişə müəyyən ehtiyatlılıq nümayiş etdirib. Bakının bir sıra sərt bəyanatlarından sonra biz indi bir qədər sakitlik görürük. Azərbaycan yəqin ki, Moskvanın hansısa formada reaksiya verməsini istəyərdi, Rusiya isə müəyyən fasilə verib, hərtərəfli araşdırmanı gözləməyi təklif edir”.