ABŞ Prezidenti Donald Tramp Ukrayna münaqişəsini birdəfəlik həll etmək əzmindədir.

Axar.az xəbər verir ki, bu barədə Ağ Evin mətbuat katibi Karolina Levitt jurnalistlər üçün keçirdiyi brifinqdə bildirib.

"Prezident Tramp dəfələrlə bəyan edib ki, Ukrayna və Rusiya bu müharibəyə sərf etdikləri qiymətli insan həyatlarını və maliyyə vəsaitlərini öz xalqlarının ehtiyacları üçün istifadə etsəydilər, daha yaxşı olardı. Bu dəhşətli münaqişə Prezident Trampın dövründə heç vaxt başlamazdı, lakin o, bu müharibəyə birdəfəlik son qoymaq əzmindədir.

Martın 18-də Prezident Donald Tramp və Prezident Vladimir Putin Ukrayna müharibəsində sülhə və atəşkəsə nail olmağın zəruriliyini müzakirə ediblər. Hər iki lider bu münaqişənin davamlı sülhlə başa çatmalı olduğunu vurğulayıb və ABŞ-Rusiya ikitərəfli münasibətlərinin yaxşılaşdırılmasının vacibliyini qeyd ediblər. Bu gün səhər Prezident Tramp həmçinin Prezident Zelenski ilə danışaraq, Rusiya və Ukraynanın tələblərini və ehtiyaclarını uzlaşdırmaq üçün fikir mübadiləsi aparıb", - deyə mətbuat katibi əlavə edib.