11:50

Rusiya və ABŞ nümayəndə heyətləri bu gün Moskva vaxtı ilə saat 10:00-da (Bakı vaxtı ilə saat 11:00) Ər-Riyadda Ukrayna münaqişəsinin həlli ilə bağlı danışıqlara başlayıb.

Axar.az xəbər verir ki, bu barədə TASS mənbəyə istinadən məlumat yayıb.

Rusiya nümayəndə heyətinə Federasiya Şurasının Beynəlxalq İşlər Komitəsinin sədri Qriqori Karasin və Federal Təhlükəsizlik Xidmətinin direktorunun müşaviri Sergey Beseda rəhbərlik edir.

***

Rusiya və ABŞ arasında Ər-Riyadda keçirilən görüşdə ikinci hissə başlayıb.

Bu barədə TASS mənbəyə istinadən məlumat yayıb.

Bildirilib ki, tərəflər arasında danışıqlar artıq 6 saatdan çoxdur davam edir.

Qeyd edək ki, danışıqlar aparan nümayəndələr iki dəfə fasiləyə çıxıblar. İlk fasilə Moskva vaxtı ilə saat 13:00 radələrində elan edilib. Saat yarımdan sonra nümayəndə heyətləri görüşlərini davam etdiriblər.

İkinci qısa fasilə təxminən saat 16:00-da olub.

***

Rusiya və ABŞ rəsmiləri arasında danışıqlar artıq 9 saatdan çoxdur ki davam edir.

Rusiya nümayəndə heyətinə Federasiya Şurasının Beynəlxalq Əlaqələr Komitəsinin sədri Qriqori Karasin və Federal Təhlükəsizlik Xidməti direktorunun müşaviri Sergey Beseda rəhbərlik edir. Amerika nümayəndə heyətinin tərkibinə Milli Təhlükəsizlik Şurasının Avropa üzrə baş direktoru Endryu Pik, Dövlət Departamentinin Siyasət Planlaması üzrə direktoru Maykl Enton, həmçinin Ukrayna üzrə xüsusi nümayəndə Keyt Kelloqun köməkçiləri və milli təhlükəsizlik üzrə müşavir Mayk Uolts daxildir.

***

Rusiya və ABŞ nümayəndələrinin görüşü başa çatıb. Məsləhətləşmələr 12 saatdan çox davam edib.

Bu barədə Rusiya nümayəndə heyətindəki mənbə məlumat verib.

Danışıqların təfərrüatı barədə məlumat verilməyib.