Ukrayna Rusiya artilleriyasını məhv etmək üçün getdikcə daha effektiv sistemlərdən istifadə edir və bu mübarizəni yeni səviyyəyə qaldırır. Martın 28-də Ukrayna Silahlı Qüvvələri bir sutka ərzində 122 artilleriya silahını məhv etdiklərini bildirdi – bu, mütləq rekorddur.

Axar.az xəbər verir ki, bu barədə “Forbes” nəşri yazıb.

Qeyd olunur ki, ümumilikdə mart ayı ərzində təxminən 1644 artilleriya qurğusu məhv edilib ki, bu da 18 ay əvvəlki ilə müqayisədə təxminən üç dəfə çoxdur. Müqayisə üçün qeyd olunur ki, ABŞ ordusunda cəmi 3000, Böyük Britaniya ordusunda isə cəmi 200 artilleriya silahı var.

Media yazır ki, bu məlumatları təsdiqləmək çətin olsa da, mövcud videolar və peyk görüntüləri göstərir ki, Rusiya itkiləri kompensasiya etmək üçün sovet dövrünə aid silah anbarlarını sürətlə boşaldır:

“Bundan əlavə, Rusiya nadir kalibrli (170 mm) Şimali Koreya silahlarını almağa başlayıb, bu da öz sistemlərinin çatışmazlığına işarə edə bilər.

Bununla belə, artilleriya hazırda döyüş meydanında daha az rol oynayır. Rusiya cəbhə xəttində taktiki zərbələr üçün planlaşdırılmış aviasiya bombalarına keçid edir. Əsas amil, görünür, cəbhədə artilleriya qurğularının məhv edilməsi olaraq qalır”.