21:17

Hindistan özünün və Pakistanın diplomatik nümayəndəliklərinin sayının azaldığını açıqlayıb.

Axar.az xəbər verir ki, bu barədə Hindistanın xarici işlər nazirinin birinci müavini Vikram Misri Cammu və Kəşmirdə baş verən son terror aktını şərh edərkən deyib.

O bildirib ki, 2025-ci il mayın 1-dək hər iki ölkənin dipmissiyalarının tərkibi 55 nəfərdən 30 nəfərə endiriləcək. Pakistanın Yeni Dehlidəki missiyasının hərbi məsləhətçiləri “persona non qrata” elan edilib və bir həftə ərzində Hindistanı tərk etmək əmri verilib. Hindistanın İslamabaddakı missiyasındakı oxşar vəzifələr ləğv edilir və əlaqədar işçilər geri çağırılacaq.

Digər addımlara Hind Suları Müqaviləsinin dayandırılması daxildir. Misri vurğulayıb ki, “Pakistan transsərhəd terrorizmi dəstəkləməyi dayandırana qədər” saziş dondurulacaq. Hindistan iki ölkə sərhədində yerləşən Attari keçid məntəqəsini də bağlayacağını elan edib.

Qeyd edək ki, Hindistan 48 saat ərzində SAARC vizadan imtina sxeminə əsasən ölkədəki bütün Pakistan vətəndaşlarını ölkədən çıxaracağını da bildirib. 1992-ci ildə tətbiq edilən SAARC viza imtiyaz sistemi yüksək vəzifəli məmurlardan və hakimlərdən tutmuş jurnalistlərə, idmançılara və iş adamlarına qədər 24 kateqoriyanı əhatə edir. Misrinin sözlərinə görə, bundan sonra Pakistan vətəndaşlarının proqram çərçivəsində ölkəyə girişi qadağan edilib və əvvəllər verilmiş bütün vizalar ləğv edilib. Hindistandakı Pakistan vətəndaşlarının ölkəni tərk etmək üçün 48 saat vaxtı var.

Bundan öncə Pakistan və Hindistan ordularının hazır vəziyyətə gətirildiyi haqda məlumat yayılmışdı.

Xatırladaq ki, Cammu və Kəşmirin Pahalqam bölgəsində silahlı hücum olub. 22 apreldə günortadan sonra üç naməlum silahlı Baysaran vadisində at sürən turistlərə fərq qoymadan atəş açıb. Hücuma görə məsuliyyəti Rusiyada fəaliyyəti qadağan edilmiş “Ləşkəri-Taibə” terror təşkilatına bağlı olan Müqavimət Cəbhəsi qruplaşması öz üzərinə götürüb.

Hücum nəticəsində, son məlumata görə, 26 nəfər ölüb, 13 nəfər yaralanıb.