Avropanın yeddi ölkəsinin parlament komitələrinin rəhbərləri ABŞ-a müraciət edərək Rusiyaya münasibətdə yanaşmanın dəyişdirilməsini tələb ediblər.

Axar.az xəbər verir ki, bu barədə “Le Monde” nəşri məlumat yayıb.

Ukrayna, Böyük Britaniya, Fransa, Çexiya, Litva, Latviya və Estoniyanı təmsil edən nümayəndələr birgə bəyanatla çıxış edərək Trampı və ABŞ Konqresini Rusiya tərəfindən gələn təcavüzə qarşı qətiyyət göstərməyə çağırıblar.

"Onlar “yumşaq siyasət”i pisləyərək, Rusiyanın terrorçu rejiminə qarşı vahid və sərt mövqe tutulmasını tələb ediblər. Ukraynanın suverenliyi heç bir xarici təzyiqin və ya kompromisin obyekti ola bilməz”, - məlumatda qeyd olunub.

Bəyanatda həmçinin NATO-ya çağırış edilib ki, Ukraynanı dərhal Alyansa qəbul etsin və Avropa Birliyinə üzvlüyünü sürətləndirsin ki, 1938-ci il Münhen səhvləri təkrarlanmasın.

Qeyd edək ki, Münhen sazişi — İngiltərə, Fransa, İtaliya və Almaniya liderləri arasında (Hitler, Mussolini, Çemberlen və Daladye) Çexoslovakiyanın Südet bölgəsinin Almaniyaya verilməsini nəzərdə tutan 29-30 sentyabr 1938-ci il tarixli sazişdir.