Ermənistanın Rusiyadakı səfiri Sergey Kopırkin müdafiə naziri Suren Papikyana açıq məktubla müraciət edərək, Ermənistan Müdafiə Nazirliyinin Hərbi Akademiyasının Komandanlıq-qərargah institutunun rəhbəri Artsrun Ovannisyanın son açıqlamalarına toxunub.

Axar.az xəbər verir ki, bu barədə Ermənistan mətbuatı məlumat yayıb.

“Erməni xalqı arasında Qələbə gününə dərin ehtiram fonunda Ermənistan Müdafiə Nazirliyinin keçmiş rəsmi nümayəndəsi A.Ovannisyanın bu müqəddəs tarixdə ölkənin əsas televiziya kanalında səsləndirdiyi, faşist Almaniyasının təcavüzünə faktiki haqq qazandıran tarixən yalan xarakterli bəyanatları geniş qəzəb doğurub. Böyük Vətən müharibəsinin məşhur sərkərdəsi, iki dəfə Sovet İttifaqı Qəhrəmanı, marşal Baqramyanın adını daşıyan Komandir-qərargah İnstitutuna (Hərbi Akademiya) hazırda rəhbərlik edən şəxsin ağzından belə ifadələri eşitmək xüsusilə ağrılı idi”, - məktubda qeyd olunub.

Kopırkin nazirlik nümayəndəsinin hərəkətlərini Hitlerin SSRİ xalqlarını əsarət altına almaq, məhv etmək planlarının həyata keçirilməsinə mane olan, həmçinin bəşəriyyəti “qəhvəyi vəba”dan xilas edən qəhrəman əcdadların xatirəsini ləkələmək cəhdi adlandırıb.

Qeyd edək ki, Ovannisyan Ermənistan İctimai Televiziyasının efirində Stalinqrad döyüşündə SSRİ-nin qələbəsinin Ermənistanı türk işğalından xilas etməsi ilə bağlı deyilənləri yalan adlandırıb. Eyni zamanda o, Almaniyanın faşist olmadığını, yalnız nasist olduğunu, İkinci Dünya Müharibəsində qələbənin ABŞ-ın “Lend-liz” yardımı və ikinci cəbhənin açılması sayəsində mümkün olduğunu bildirmişdi.