ABŞ Prezidenti Donald Tramp son dövrlərdə İsrailə qarşı sərt mövqeyi ilə diqqət çəkib. Orta Şərq turu zamanı İsrailə səfər etməyən Tramp Təl-Əvivin İranla müharibə üçün Konqresdəki neokonları və keçmiş milli təhlükəsizlik müşaviri Mayk Uoltsu hərəkətə keçirməsinə qəzəblənib.

Axar.az xəbər verir ki, bu sözləri türkiyəli ekspert Əmrə Öztürk deyib.

Öztürk bildirib ki, Tramp bu səbəbdən Uoltsu vəzifədən azad edib və neokonlarla açıq qarşıdurmaya girib. ABŞ mediasına görə, Tramp öz administrasiyasına “Çindən başqa düşmənimiz yoxdur və savaş istəmirəm” mesajı verib:

“Netanyahu Trampın sadiq müttəfiq olduğunu düşünərək, İrana qarşı ABŞ-ın dəstəyi ilə bir hərbi hücum planlaşdırırdı. Bu strateji plan Vaşinqtondakı respublikaçılar və neokonların dəstəyini qazanıb. İddiaya görə, Netanyahu bu məqsədlə Trampın o zamankı milli təhlükəsizlik müşaviri Mayk Uoltsa təsir etməyə çalışıb”.